Sjarmerande gardsovernatting i fjellbygda Skjåk! Historiske Ramlarstugu er restaurert til ein koseleg overnattingsstad med god atmosfære. Ramlarstugu består av kun eitt rom med historisk skuvseng – som utslått tener som dobbeltseng. Bad med toalett og vatn finn du i nabobygget. Kvar morgon serverer vi herleg frukost med våre nyverpa Gudbrandsdalsegg i den historiske landhandelen Ramstadbue til kr. 150,- (80,- for barn). På historiske Nordigard Ramstad kjem eventyret i mange formar. Frå fjøset, på garden, i naturen, ved matbordet, gjennom historia og i den storslåtte fjellheimen som omgir oss. Garden ligg på solsida i Skjåk – krinsa av nasjonalparkane Jotunheimen, Reinheimen og Breheimen. Fjellmetropolen Lom ligg ein svipptur unna, fjordperla Geiranger motsatt veg. På Nordigard Ramstad vaknar du i tindeparadis, men hjå oss er overnatting langt meir enn ein god natts søvn. Bringebær kan du gjerne få plukke, og vil ungane vere med å sortere egg i hønseriet, så klukkar vertskapet nøgde (Må avtalest på forhånd). Leikarstugu, huskestativ, sandkasse og eventyrleg buldrestein finst og i det intime tunet. Ynskjer du anna overnatting, så er det mogleg å leige både fullt utstyrt leilegheit for inntil seks personar, bonderomantiske Eldhuset (inntil fire personar med bad og kjøken) eller intime Ysthuset (soveseng for to – bad med toalett og vatn i nabohuset). ...og så må vi få invitere deg inn i den historiske landhandelen på tunet: Ramstadbue – sjarmbombe og sosial møteplass av ei anna tid. Mellom dei historiske tømmerveggane midt på gardstunet finn du både landhandel, gardspub, historisk kafé og selskapslokale på eit nøye dandert brett. Historiske godbitar av ymse slag er for sal, så kan det hende du litt lettare klarer å rive deg laus. Sjekk gjerne Nordigard Ramstad si nettside for å bli betre kjend med oss. Velkomen til gards!